غضب جمهور ليفربول ع داروين نونيز بعد بوست مثير للجدل قبل التتويج
جماهير ليفربول مولعه نار بسبب تصرف غريب عمله داروين نونيز مهاجم الفريق، قبل بيوم واحد من تتويج الريدز بلقب الدوري الإنجليزي الممتاز.
قبل ماتش توتنهام، كان كل اللعيبه بتتكلم عن أهمية الفوز، وفان دايك بنفسه طلب من الجماهير تيجي لابسه أحمر عشان يكون يوم احتفالي.
لكن نونيز كان ساكت طول مشوار الفريق، وفجأة كسر الصمت بطريقة غريبه, حسب موقع “سبورت بايبل”، نونيز نشر بوست ع حسابه فـ إكس وقال فيه: “مش غريب إني مش بلعب كتير، لأن آخر ماتش لعبته كنت كويس وفجأة”.
وبعدها بشويه مسح البوست وحط مكانه صوره ليه مع زميله ماك أليستر وفنجان شاي وكتب “صباح الخير”، كأن مفيش حاجه حصلت.
الجمهور ما سكتش، واحد كتب: “نونيز أحمق، كلنا كنا نفسنا ينجح بس واضح انه مش قد المسؤليه”، والتاني قال: “خلاص مسيرته انتهت مع ليفربول، جمدوه وبيعوه الصيف الجاي”.
ناس تانيه قالت إنه عاطفي أوي، بيعيش لحظات مجنونه لما يكون كويس، لكن لما يقع بيقع جامد.
