مورينيو على أبواب الدوري السعودي ونيوم داخل بقوه لخطفه من فنربخشة
الصحافه التركيه كشفت خلال الساعات اللي فاتت، إن في مفاوضات شغاله بين ناديين سعوديين والمدرب البرتغالي الشهير جوزيه مورينيو، مدرب فنربخشة الحالي.
مورينيو اللي راجع للتدريب مع فنربخشة بعد راحه قعد فيها حوالي 6 شهور، عقده لسه مستمر معاهم لحد نهاية الموسم الجاي.
حسب شبكة “Sporx” التركيه، نادي نيوم السعودي دخل بقوه فـ خط المفاوضات مع مورينيو، وبيحاول يقنعه إنه يقود الفريق بداية من الموسم الجديد، بدل المدرب شاموسكا، اللي صعد بنيوم لأول مره لدوري روشن بعد موسم تاريخي.
نفس الشبكه كمان قالت إن في نادي سعودي تاني من دوري روشن داخل فـ الصفقه، لكن نيوم ظاهر عليه الجديه أكبر وحابب يحسم الموضوع بسرعه.
نيوم كان حسم صعوده الرسمي لروشن بعد فوز كبير على العربي 3-0 فـ دوري يلو، والاداره عاوزه تضرب ضربه معلم بتعيين اسم عالمي زي مورينيو عشان يثبتوا وجودهم فـ الكبار من أول موسم.
