مشاده ناريه بين مسلم وزوجه صاصا بسبب تعليق علي اغانيه
الدنيا ولعت ف اوساط المهرجانات بعد تعليق مسلم علي اغاني عصام صاصا، واللي فتح باب خناقه جديده لما قال انه مابيسمعش اغانيه علشان الألفاظ رغم انه بيحبه كشخص، الكلام ده قاله ف برنامج تلفزيوني لكن اللي حصل بعده كان غير متوقع.
جهاد احمد زوجه صاصا طلعت هاجمت مسلم بشده، وقالت انه ناسي المعروف وان جوزها استضافه ف بيته زمان لما كان مسلم ملوش مكان يقعد فيه ف القاهره، وانه كان جاي من اسكندريه علشان شغل مع صاصا.
مسلم مردش يتجاهل، طلع لايف علي انستجرام وقال إنه مش قصد الإهانه، لكن رأيه الفني بصراحه، وقال كمان حتى لو ساعدتوني، مينفعش تعايروني بيه، ده مش من الأصول وأكد إن الهجوم عليه كان شخصي مش فني وده مرفوض بالنسبه له.
الناس اتقسمت، في اللي شاف مسلم صريح ومحترم، وفي اللي قال انه غلطان ماكانش لازم يفتح الكلام ده، خصوصا انه كان بينه وبين صاصا علاقه سابقه.
صاصا نفسه لسه ماردش، بس الكل مستني رد فعله عاللي حصل، خصوصا بعد الانتشار الكبير للأزمه عالسوشيال ميديا.
