أنغام تغني لأول مره بلندن على مسرح رويال ألبرت هول الكبير
النجمه الكبيره أنغام بتحضّر دلوقتي لحفلها الأول في لندن، وده هيكون على مسرح رويال ألبرت هول يوم 23 سبتمبر الجاي، وده واحد من أعرق المسارح الموسيقيه في العالم، واللي غنى عليه أكبر النجوم العالميين، وده ضمن جولتها العالميه اللى بتسعى من خلالها ترفع من قيمة الأغنيه العربيه في العالم.
أنغام هتطلع في الحفله مع الأوركسترا بتاعها، اللي متعودة تشتغل معاهم في أغلب حفلاتها، وهتقدملنا مجموعه من أغانيها الجديده من ألبوم تيجي نسيب اللي حقق نجاح كبير في الوطن العربي، بجانب شوية أغاني من القديم اللى كلنا حافظينها.
الألبوم الأخير بتاع أنغام فيه أغنيه اسمها وبقالك قلب من كلمات أمير طعيمة، وتوزيع طارق مدكور، وألحان رياض الهمشري، وده كان ملحن قديم واتوفى من 17 سنه وكمان فيه أغنيه تانيه اسمها هو إنت مين من كلمات هاله الزيات وألحان محمود خيامي.
كمان، أنغام هتغني في دار الأوبرا المصريه يوم 16 مايو، على مسرح النافوره بقيادة هاني فرحات، في حفله بتنظمها شركه تذكرتي ضمن مشروع ليالي مصر اللى هدفه نشر الفن الراقي بالمحافظات.
