مانشستر سيتي يطلب من الدوري الإنجليزي كشف تفاصيل قروض أندية منافسة
في تطور جديد في الصراع الدائر بين مانشستر سيتي ورابطة الدوري الإنجليزي الممتاز، طلب محامو السيتي من الرابطة تفعيل إحدى القواعد الداخلية لفرض الشفافية على عدد من الأندية، منها أرسنال، برايتون، وإيفرتون، وكشف تفاصيل القروض اللي حصلوا عليها من ملاكهم. وده حسب ما نشر الصحفي مايك كيغان في صحيفة “ديلي ميل”.
السبب في المطالبة دي إن مانشستر سيتي شايف إن الأندية دي استفادت بشكل غير عادل من قروض ضخمة حصلوا عليها من المساهمين، زي القرض اللي حصل عليه أرسنال بقيمة 259 مليون جنيه، وإيفرتون اللي حصلوا على 450 مليون جنيه، وبرايتون اللي وصلت قروضهم لـ406.5 مليون جنيه والسيتي بيعتبر إن ده تمييز مالي غير عادل، خصوصًا إنه هو نفسه عليه قيود قاسية فيما يتعلق بعقود الرعاية، وأبرزها عقده مع شركة “الاتحاد”.
مانشستر سيتي مش بس بيطالب بالكشف عن التفاصيل، لكن كمان بيحاول يسلط الضوء على ما يراه “ازدواجية في تطبيق القواعد”، خاصة في المعركة القانونية اللي بيخوضها ضد التعديلات الأخيرة على نظام الرعاية المالية في الدوري الإنجليزي، واللي شايف إن السيتي هو المستهدف فيها بشكل خاص.
الأيام الجاية هتكون حاسمة، خاصة إن الأمور مش هتتوقف عند هذا الحد، والنادي مستمر في محاولاته لفرض التعديلات اللي يراها عادلة.
