كوناتي بيعيش الحلم أول فرنسي يرفع الدوري مع ليفربول
المدافع الفرنسي إبراهيما كوناتي لاعب ليفربول عبر عن فرحته الكبيره بعد تتويج “الريدز” رسميًا بلقب الدوري الإنجليزي الممتاز يوم الأحد اللي فات، وقال إن اللحظه دي كانت الأجمل في مسيرته الكرويه.
كوناتي صرح لموقع النادي الرسمي وقال: “فاكر فرحتنا لما كسبنا كأس كاراباو الموسم اللي فات في ويمبلي، كانت لحظه جميله، بس التتويج بالدوري له طعم تاني خالص، وخصوصًا إنه بيجي بعد تعب ومشوار طويل”.
وأضاف: “بعد ما خلصت المباراه، رجعت وقعدت في المدرجات زي أي مشجع، كنت بحاول أستوعب اللي حصل، ومش لاقي كلام يعبّر عن اللي جوايا”.
وأكد كوناتي إن رفع الكأس في الجولة الأخيره قدام جماهير ليفربول هتكون لحظه تاريخيه بالنسبه له، وقال: “بعد أربع سنين هنا، الحلم أخيرًا اتحقق”.
وفي النهايه قال: “أنا من وانا صغير وأنا بتابع البريميرليج كل أسبوع، ودلوقتي بلعب فيه، بل وأول فرنسي في تاريخ ليفربول يحقق اللقب ده، شعور مش طبيعي بصراحه”.
كوناتي بيعيش أحلى أيامه، والريدز بيرجع للواجهه من جديد.
