أرتيتا يوجه رسالة نارية لجماهير أرسنال قبل موقعة باريس المصيرية
قبل ساعات من القمة النارية اللي هتجمع أرسنال بباريس سان جيرمان على ملعب الإمارات، في ذهاب نصف نهائي دوري أبطال أوروبا، خرج المدرب الإسباني ميكيل أرتيتا برسالة مؤثرة ومليانة حماس لجماهير “الجانرز”، طالبهم فيها يكونوا جزء فعلي من المعركة الليلة.
أرتيتا قال بصوت كله حماس وثقة:
“ده وقتنا. جه الوقت نحقق اللي بنحلم بيه محتاج الجماهير الليلة، محتاج كل واحد في المدرج، محتاج اللي جنبك يشجع، ويصرخ، ويؤمن بينا. عايزك تلعب كل كرة معانا، تحس بكل تمريرة، وكل تدخل، وكل انطلاقة.”
وأضاف:
“الملعب لازم يولّع بطاقة الجماهير. أنا معتمد عليكم النهاردة دي لحظة مصيرية ووجودكم هيفرق.”
رسالة أرتيتا كانت موجهة مباشرة لقلوب جمهور أرسنال، اللي كان دايمًا السند للفريق خصوصًا في اللحظات الصعبة، واللي اتأملوا كتير يرجعوا يشوفوا فريقهم في نصف نهائي دوري الأبطال بعد سنين من الغياب.
أرسنال داخل اللقاء بثقة كبيرة، خاصة بعد النتائج القوية في ملعب الإمارات، اللي بقى فعلاً حصن للفريق لكن أرتيتا عارف كويس إن الميزة الحقيقية هتكون في المدرجات، لما يعلو صوت الجماهير ويدفعوا الفريق لقدّام في كل لحظة.
الساعة عشرة مساءً بتوقيت السعودية، هتكون العيون كلها على لندن… وأرتيتا بيطلب من جماهيره تكون روح الفريق رقم 12.
