ريال مدريد يتلقى صدمة جديدة بعد إصابة ميندي وغيابه لنهاية الموسم
ريال مدريد بيمر بواحدة من أصعب فتراته الموسم ده، وكل يوم بيزيد الضغط على الفريق بسبب الإصابات اللي مش راضية تسيبه في حاله وآخر المصايب جات من الظهير الأيسر فيرلاند ميندي، اللي أعلن النادي رسميًا غيابه عن باقي مباريات الموسم، وكمان بطولة كأس العالم للأندية، بعد إصابة قوية في العضلة الأمامية للفخذ الأيمن.
الفحوصات الطبية أكدت إن عنده تمزق في الوتر القريب للعضلة، واللي بتعتبر إصابة من النوع الثقيل، وبتحتاج وقت مش قليل علشان يتعافى منها تمامًا واللي زاد الطين بلّة، إن الإصابة دي جات بعد ما رجع من غياب دام 45 يوم بسبب إصابة عضلية، ولسه راجع في نهائي كأس الملك، بس ماكملش غير 8 دقايق في الملعب ووقع تاني!
واضح إن الدفع بيه في المباراة كان مخاطرة مش محسوبة، خصوصًا بعد إصابة كامافينغا وفقدان الثقة في فران غارسيا، فكان قدام المدرب كارلو أنشيلوتي حل واحد: يغامر بميندي، ودي كانت مغامرة مؤلمة جدًا للفريق واللاعب.
الحقيقة إن قصة الإصابات بقت مرتبطة باسم ميندي من يوم ما وصل مدريد سنة 2019. اللاعب غاب أكتر من 100 يوم في كل موسم، واتعرض لـ17 إصابة خلال 6 مواسم، رقم مخيف بيخلي الاستمرار معاه دايمًا فيه علامات استفهام، حتى لو كان واحد من أهم القطع التكتيكية في دفاع الملكي.
غياب ميندي بيحط ضغط إضافي على دفاع مدريد، اللي أصلاً بيعاني من نقص حاد، في وقت حرج جدًا من الموسم، سواء في الدوري أو دوري الأبطال وكارلو أنشيلوتي هيكون مطالب بإيجاد حلول سريعة، لكن في ظل الغيابات الكتير، المهمة مش سهلة خالص.
جمهور ريال مدريد قلقان، والإصابات بقت كابوس متكرر، والكل مستني يشوف إزاي الفريق هيكمل المشوار بدون نص قوامه الأساسي تقريبًا.
