كيبا الأقرب لحراسة مرمى ريال مدريد الموسم الجاي وسط غموض لونين
رغم إن الموسم لسه مخلصش، إدارة ريال مدريد بدأت تحضّر بكل جدية للموسم اللي جاي، وبتحاول تقفل الملفات الشائكة قبل ما الصيف يولع واحد من أهم الملفات دي هو مركز حراسة المرمى، وده بسبب الغموض اللي بيحيط بمستقبل الحارس الأوكراني أندري لونين، رغم إنه جدد عقده مؤخرًا لحد 2030.
صحيفة “ريليفو” الإسبانية فجّرت مفاجأة لما قالت إن كيبا أريزابالاغا، الحارس الإسباني اللي حالياً مع بورنموث الإنجليزي، هو المرشح الأقرب لحماية عرين الملكي الموسم الجاي، لو قرر لونين يشوف عرض تاني ويرحل عن الفريق.
كيبا ساب بصمة كويسة في فترة إعارته السابقة مع ريال مدريد، ومع أداءه القوي حاليًا في الدوري الإنجليزي مع بورنموث، واللي كان ليه دور كبير في بقاء الفريق ضمن الممتاز، بقى على رادار بيريز من تاني، وبقوة.
رغم إن فيه أسماء تانية كانت مطروحة زي دوناروما وخوان غارسيا، بس كيبا شكله الأقرب، خصوصًا إنه عارف الأجواء داخل النادي ومرتاح فيها، ودي نقطة تحسب له مقارنة بأي اسم تاني محتاج وقت يتأقلم.
إدارة ريال مدريد واضح إنها مش عايزة تدخل الموسم الجاي وعندها صراعات أو عدم استقرار في مركز حراسة المرمى. الموضوع حساس، خصوصًا بعد ما عاش الفريق فترة صعبة مع إصابة كورتوا واعتمادهم على لونين اللي فجّر مستواه فجأة.
دلوقتي الكورة في ملعب لونين، هل هيكمل ويقاتل على مكانه الأساسي؟ ولا هيفضل يخرج ويخوض تجربة جديدة؟ وفي الحالتين، ريال مدريد ناوي مايتفاجأش، وبيجهز البديل من بدري.
