تصريحات والد لامين جمال تشعل الجدل.. وبرشلونة خايف على نجمه
من جديد، اسم لامين جمال بيرجع يتصدر العناوين، بس المرة دي مش عشان مهاراته أو أهدافه، لكن بسبب تصريحات والده اللي سببت ضجة كبيرة في كتالونيا! الراجل طلع وقالها بصراحة: “إحنا في برشلونة عشان بيدفعوا”، وأكد إنه من عشاق ريال مدريد، وده الكلام اللي فجّر غضب كبير وسط جمهور البرسا.
الجمهور الكتالوني مش بس زعلان، لأ في ناس شايفين إن الكلام ده فيه تقليل من قيمة النادي، وإنه ممكن يأثر على تركيز لامين، خصوصًا إنه لسه صغير وبيخطو أول خطواته في عالم النجومية.
بس خلينا نكون واقعيين، لامين لحد دلوقتي مفرّطش، والولد باين عليه ملتزم وعنده شغف باللعب وميول الوالد ما تعنيش إن اللاعب نفسه ما بيحبش برشلونة. في الآخر، الولاء داخل الملعب هو اللي بيحسم كل حاجة، مش كلام خارجه.
برشلونة عنده كنز اسمه لامين جمال، وعلشان يبني عليه مشروعه القادم، لازم يحافظ عليه ويحميه من الضغط الإعلامي والجماهيري اللي مالوش لازمة وكفاية على الولد الضغط اللي بيعيشه جوه الملعب، ماينفعش نحمله كمان مشاكل أبوه!
اللي حصل بيأكد إن أي حاجة حوالين اللاعبين النجوم ممكن تتحول لقضية، حتى لو مجرد رأي شخصي من أهلهم وبس في النهاية، العقل بيقول إن اللي يهم هو اللاعب نفسه، ومدى التزامه بالكيان اللي بيمثله.
برشلونة محتاج يقفل الملف ده بسرعة، ويركّز على تنمية الموهبة اللي عنده، لأن الكرة ما بتستناش، وكل ضجيج خارجي ممكن يضيّع حلم كبير.
