انسحاب DAZN يهز الدوري الفرنسي.. وأزمة مالية تضرب الأندية من جديد
في خطوة ما كانتش متوقعة بهالشكل المفاجئ، منصة البث المباشر DAZN قررت تنسحب من عقد نقل مباريات الدوري الفرنسي، بعد أقل من سنة على توقيع العقد اللي كان المفروض يمتد لخمس سنين كاملة بقيمة 375 مليون يورو سنويًا!
الانسحاب حصل بعد مفاوضات خلف الكواليس بين DAZN ورابطة الدوري الفرنسي (LFP)، وانتهى باتفاق على فسخ العقد مقابل تعويض 100 مليون يورو تدفعه المنصة، وده طبعًا رقم أقل بكتير من القيمة الأصلية، بس بيكشف قد إيه الطرفين كانوا حابين ينهوا الموضوع بأسرع وقت.
اللي متابع الملف كويس، يعرف إن العلاقة بين DAZN والرابطة ما كانتش وردية من البداية والخلافات بدأت من يناير بسبب بنود معينة في العقد، وDAZN كانت بتشتكي من عدم وجود ضمانات مالية كافية ومن ضعف مكافحة القرصنة، ده غير اتهاماتها إن الرابطة كانت بتتلاعب بالأرقام في العقود السابقة مع أمازون وCanal+.
رابطة الدوري قررت تعقد اجتماع يوم 2 مايو علشان تصوت بشكل رسمي على القرار، بس حاليًا واضح إن الأندية الفرنسية داخلة على أزمة مالية خانقة وأغلب الفرق هناك معتمدة بشكل كبير على فلوس حقوق البث، ومع انسحاب DAZN، الأمور دخلت في نفق مظلم.
الحل اللي بتدرسه LFP حاليًا هو إطلاق قناة خاصة اسمها LFP Media، ودي تبقى مسؤولة عن نقل المباريات بنفسها من غير وسيط زي DAZN والفكرة دي مطروحة من زمان، بس دلوقتي بقت “أخف الضررين” في ظل انهيار العائدات المتوقعة.
كمان لازم نذكر إن صندوق CVC، اللي هو شريك مالي للرابطة، بيحصل على 13٪ من دخل حقوق البث، يعني حتى لو لقوا بديل بسرعة، الأرباح هتفضل مقسومة، وده بيصعّب الموقف أكتر.
DAZN قالت إن خسائرها في السوق الفرنسي كانت ما بين 200 لـ250 مليون يورو، وعدد المشتركين ما عداش نص مليون، رغم إن الهدف كان يوصل لمليون! فبالنسبة لهم، الانسحاب كان الحل الوحيد عشان يوقفوا نزيف الخساير.
اللي حاصل دلوقتي بيعني إن الدوري الفرنسي داخل على سنوات صعبة جدًا ماليًا، ولو ما اتلاقاش حل جذري وسريع، ممكن نشوف تأثيرات كبيرة على المنافسة، وانتقالات اللاعبين، وحتى استمرارية الأندية الصغيرة.
