مدبولي: بنراقب الأسعار كل يوم وهنواجه أي جشع ف الأسواق
في ظل الغلاء اللي كان بيعاني منه الناس، الحكومة مش قاعدة ساكتة، وده اللي أكده الدكتور مصطفى مدبولي، رئيس مجلس الوزراء، لما ترأس اجتماع اللجنة العليا لضبط الأسواق النهاردة ومدبولي قال بصراحة إن الدولة بتتابع يوميًا أوضاع السوق، والأسعار، وتوافر السلع للناس في كل حتة.
الاجتماع حضره وزرا ومسؤولين كبار، وكان فيه كلام واضح عن ضرورة الرقابة المستمرة على السوق، ومفيش تهريج مع اللي يرفع الأسعار أو يخبي سلع والحكومة شغالة دلوقتي على تطبيق آليات جديدة زي “كارت المفتش” و”رادار الأسعار”، اللي هيساعدوا في متابعة السوق لحظة بلحظة، ويخلوا أي تاجر بيغلي أو بيحتكر يتكشف بسرعة.
الدكتور شريف فاروق، وزير التموين، عرض في الاجتماع مؤشرات الأسعار الجديدة، وقال إن السكر نزل من ٣٦ و٣٩ جنيه للكيلو، لـ٣٠ جنيه بس، وده لأن الاحتياطي يكفي أكتر من ١٤ شهر، وكمان سعر طبق البيض نزل من ٢١٠ لـ١٤٠ جنيه، وفي بعض المناطق وصل لـ١٠٠ جنيه.
المستشار محمد الحمصاني، المتحدث باسم مجلس الوزراء، قال إن وزارة التموين مش بس بتراقب، دي كمان طورت منظومات ذكية زي “اللوحة المعلوماتية” و”مراقبة الأسواق” ونظام خاص لمتابعة المخزون الاستراتيجي، عشان أي نقص يتم التعامل معاه فورًا.
ومن ضمن الحاجات المهمة اللي اتعرضت في الاجتماع، كانت نتيجة استطلاع رأي من مركز المعلومات، واللي بيقول إن ٩٠٪ من المواطنين لقوا السلع اللي بيدوروا عليها، و٩٤٪ من أصحاب المحلات قالوا إن الحكومة ساعدت في ضبط الأسعار وتوفير البضاعة.
وفي الآخر، الحكومة أكدت إنها مكملة في خطتها لضبط السوق، وهتستجيب فورًا لأي بلاغ من الناس على المنصات الإلكترونية والتقارير الدولية كمان مبشرة، وبتقول إن التضخم هيقل في ٢٠٢٦ مقارنة بـ٢٠٢٥، رغم وجود أزمات عالمية.
