ميرينو: هنكسب باريس في ملعبه ونوصل النهائي بإذن الله
في تصريح كله حماس وثقه، قال ميكيل ميرينو نجم أرسنال إن فريقه يقدر يعوّض خسارة الذهاب قدّام باريس سان جيرمان، ويتأهل لنهائي دوري أبطال أوروبا، رغم الخسارة بهدف نظيف في ملعب الإمارات واللي سجله عثمان ديمبيلي.
ميرينو قال في كلامه اللي نقلته وكاله الأنباء البريطانية: “ملعب باريس صعب طبعًا، بس إحنا مش فريق سهل برضو، ومع كامل الاحترام ليهم، إحنا رايحين علشان نكسب”.
وأضاف: “فاكرين لما لعبنا قدام ريال مدريد في البرنابيو؟ كسبناهم 2-1، وكمان غلبنا فرق كتير في البريميرليج، وده بيخلينا واثقين في نفسنا جدًا قبل ماتش الإياب”.
اللاعب كمان وضّح إن الفريق دايمًا بيلعب بعقليه الفوز مهما كانت النتيجه، وقال: “حتى لو كنا كسبانين 3 قبل ما نروح باريس، مش هنلعب ندافع، إحنا دايمًا بنفكر في المكسب”.
ماتش الإياب المنتظر بين باريس وأرسنال هيتلعب يوم الأربع الجاي، والكل مستني يشوف مين هيحجز بطاقة النهائي الكبير.
