أستون فيلا ممكن يبيع مارتينيز وبيلي لدوري السعودي بالصيف
بدأت الأنظار تتوجه تاني للدوري السعودي، والمرادي الدور على نجوم أستون فيلا، إيمليانو مارتينيز حارس مرمى الأرجنتين، والجناح السريع ليون بيلي.
تقارير إنجليزيه، وعلى رأسها “تيليجراف”، قالت إن الاتنين على رادار الأنديه السعوديه في الانتقالات الصيفيه الجايه.
مارتينيز، اللي عنده 32 سنه، ومع إنه مش في أفضل حالاته الموسم ده، بس يفضل اسم تقيل في حراسة المرمى، خصوصًا بعد اللي عمله في كأس العالم مع الأرجنتين.
الصحيفه قالت إن لو الصفقة تمت، هتكون نقله كبيره للدوري السعودي.
حد من داخل السعوديه صرّح للصحيفه وقال إن فعلاً في نيه للتحرك وجلب اللاعبين دول، بس لسه هويات الأنديه المهتمه مش واضحه.
الجدير بالذكر إن فيلا كان باع قبل كده مهاجمه الكولومبي جون دوران للنصر في يناير، وكمان موسى ديابي راح الاتحاد في الصيف اللي فات، وكل ده علشان النادي يلتزم بالقوانين الماليه الصارمه في إنجلترا وأوروبا.
ومع إن النادي ممكن يتأهل لدوري الأبطال، إلا إنه شكلهم ناويين يبيعوا أكتر، والحديث حالياً عن احتمالية خروج مارتينيز لو جالهم عرض كبير من السعوديه.
