طبيب مارادونا يقول خروجه من المستشفى كان غلطة كبيره جداً
في تطورات جديده فـ قضية وفاة أسطورة الكوره دييغو مارادونا، طلع دكتور العنايه المركزه فرناندو فياريخو وأكد إن خروجه من المستشفى بعد عملية المخ فـ 2020 كان قرار مش سليم خالص.
وقال إن مارادونا كان محتاج رعاية مستمره ومتابعه لصيقة، خصوصاً إنه كان بيعاني من مشاكل نفسيه وإدمان كمان.
الدكتور اللي كان مسؤول عن قسم العناية في مستشفى “أوليفوس” قال بصراحه: “ماكنش ينفع يروح البيت، الراجل كان تحت مهدئات وكان ممكن يئذي نفسه من غير ما يحس”.
وأشار كمان إنه كان المفروض يخضع لنظام رعايه منزليه شبه مؤسسيه، يعني فيها دكاتره ومرافقين وممرضين ع طول الخط، وده للأسف ماحصلش.
النتيجه إن مارادونا مات بعد أسبوعين فـ بيته، بأزمه قلبيه ورئويه، والمصيبه إن دلوقتي في 7 من الفريق الطبي بيتحاكموا بتهمة القتل العمد الاحتمالي، ودي ممكن توصل لعقوبه 25 سنه سجن.
المحاكمه بدأت من مارس وهتفضل شغاله لحد يوليو، وكل أسبوع فيها جلستين، وشهادات كتير بتتكلم عن فوضى في العلاج، وإن مافيش حد كان واخد قرار واضح. وكل ده مع أسطوره زيه!
