توتر شديد بين خيسوس ولاعبي الهلال بعد خسارة قدام الأهلي
يعيش نادي الهلال حاله مش ولا بد فـ الساعات الأخيره، بعد الهزيمه الكبيره اللي اتلقاها من الأهلي 3-1 في نصف نهائي دوري أبطال آسيا للنخبه، وده خلا الجماهير والإداره واللاعبين في حاله غضب شديد.
وبحسب تقارير، في اجتماع طارئ النهارده بين خيسوس وإدارة الهلال عشان يحددوا مصيره، وهل هيفضل ولا هيمشي، وبيقال إن الإداره مالت لفكرة رحيله، خصوصًا بعد توديع نخبة آسيا وكأس الملك، وكمان تراجع فرص الفوز بدوري روشن.
اللي زوّد الطين بله، هو إن عدد من اللاعبين مش راضيين عن قرارات خيسوس الفنيه، خصوصًا تغييراته الغريبه قبل وأثناء مباراة الأهلي، زي لما قرر يشرك علي البليهي أساسي على حساب حسان تمبكتي، رغم إن البليهي كان بعيد عن مستواه ومش بيلعب أساسي بقاله فتره.
كمان، اللاعبين اشتكوا من إن المدرب ما التزمش بالخطة اللي اتدربوا عليها قبل الماتش، وده خلاهم يدخلوا اللقاء مش متفاهمين، والتبديلات اللي حصلت برضو كانت غريبه ومش مفهومة.
الوضع دلوقتي داخل النادي محتقن، والجميع مستني القرار النهائي بخصوص خيسوس خلال الساعات القادمه.
