هارفي إليوت يرد على طلب الرحيل من ليفربول بعد التتويج بالدوري
بعد ما ليفربول حسم لقب الدوري الإنجليزي رقم 20 فـ تاريخه، بدأت الأنظار تتجه لسوق الانتقالات الصيفيه، وبدأت الأحاديث عن لعيبه ممكن تمشي، ومن ضمنهم هارفي إليوت.
حسب تقارير من “سبورت بايبل”، المدرب السابق تيم شيروود قال إن النادي طلب من إليوت يدورله على نادي تاني يقدر يشارك فيه بشكل أكتر، عشان الفرص عنده الموسم ده كانت محدوده، وشارك فـ 24 ماتش وسجل أربع أهداف وصنع اتنين بس.
لكن إليوت رد على الكلام ده وقال فـ تصريحات صحفيه: “أنا عايز أكمل هنا.
ده فريقي وده مكاني، وكل حاجه بتعتمد على النادي والمدرب، بس بالنسبالي، نفسي أفضل هنا طول مسيرتي”.
وأضاف: “مش عارف المستقبل مخبيلي إيه، بس لحد دلوقتي، أنا هنا ومش ناوي أتحرك، والجمهور هنا حاجه كبيره بالنسبه ليا، ومفيش مكان أحسن ألعب فيه من آنفيلد”.
اللاعب عنده 22 سنه، ولسه قدامه كتير يقدمه، بس موقفه دلوقتي مازال غامض، والنادي عنده قرارات مهمه ياخدها قبل بداية الموسم الجديد.
