تشابي ألونسو مدرب مدريد الجديد بعد رحيل أنشيلوتي الرسمي المنتظر
واضح إن تشابي ألونسو بقى هو الخيار الأول والأقرب لتدريب ريال مدريد الموسم الجاي، بعد ما الأمور اتعقدت بالنسبه لأنشيلوتي، اللي كان عنده فرصه يكمل لحد 2026 بشرط يحقق بطولات كبيره، زي دوري الأبطال أو كأس الملك، أو حتى يقلب الليغا بشكل إعجازي.
لكن بعد ما خرج الريال من دوري الأبطال قدام آرسنال، والخساره قدام برشلونة في نهائي الكأس، الأمور خلصت، وبقى معروف إن أنشيلوتي هيمشي رسمي يوم 25 مايو الجاي.
ومن ناحيته هو، مش زعلان، لأنه أصلاً جاله عرض كبير من البرازيل لتدريب المنتخب، وعقد طويل كمان.
إدارة الريال قالت لتشابي إنه مش هيقود الفريق في كأس العالم للأندية، اللي هيقودها مؤقتًا هو سانتياغو سولاري، وتشابي يبدأ من أول فترة الإعداد لموسم 2025-2026.
تشابي نفسه مش حابب يدخل في ضغط المباريات على طول، وعايز وقت يتعرف على الفريق ويبدأ من الصفر، خصوصًا إنه بيجهز بيته في مدريد من وقت الكريسماس، ومتحمس للبدايه مع صفقات جديدة وعودة لاعبين كبار زي كارفاخال وكامافينغا وميليتاو.
