تحليل فني يكشف سر تفوق إنتر ميلان قبل صدامه مع برشلونة
في تحليل فني نشرته صحيفة “سبورت”، اتكلم بويان كركيتش الأب عن طريقة لعب إنتر ميلان، واللي هيكون خصم برشلونة في نصف نهائي دوري أبطال أوروبا، وقدّم وصف دقيق لطريقة لعب الفريق الإيطالي، واللي بيلعب بخطة 3-5-2، لكن بيعدلها حسب كل مباراة.
إنتر معروف بإنضباطه الدفاعي، خصوصًا برا ملعبه، وده باين في دور المجموعات لما استقبل هدف واحد بس، يعني عندهم تماسك قوي جدًا، ودفاعهم بيقرب من المرمى حوالي 30 متر، ومعاهم تلات قلوب دفاع، وظهيرين بيرجعوا يساندوا، وده بيخلي الخصم يضطر يهاجم من الأطراف بدل العمق.
ولما يهجم الإنتر، بيبدأوا من تحت بتمريرات طويلة وتحركات سريعة، من لاعيبة زي بافارد وباستوني، والمساندة بتيجي من باريلا ومختاريان اللي بيتقدموا من ورا.
كمان الأظهرة بتقدم انطلاقات خطيرة وعرضيات دايمًا مزعجة لأي دفاع.
هجومهم كمان خطير وسريع، وبيعرفوا يستغلوا أنصاف الفرص، وده بيخليهم فريق صعب جدًا في الثلث الأخير.
برشلونة لازم يلاقي طريقة يفك بيها التكتل ده بأقل عدد تمريرات، ويعتمد على لامين جمال ورافينيا، ويركز دفاعيًا خصوصًا في الكرات الثابتة، عشان الإنتر بيعرف يضرب بيها.
