تورام يسجل بالكعب وزي ماجر وفليك يتفرج على الكعب مرتين
في لقطة رجّعت الذاكرة سنين ورا، سجل ماركوس تورام هدف إنتر ميلان الأول في شباك برشلونه بنفس طريقة الأسطورة الجزائري رابح ماجر، بالكعب، في ذهاب نصف نهائي دوري أبطال أوروبا.
تورام فاجئ الكل بهدف خرافي بالكعب مع أول دقيقه، زي ما عملها ماجر زمان سنة 1987 في نهائي دوري الأبطال لما كان بيلعب مع بورتو ضد بايرن ميونخ وسجل الهدف التاريخي اللي دخل كتب الكوره.
الغريب بقى، إن القاسم المشترك في اللقطتين مش بس الكعب، لأ، ده كمان تواجد الألماني هانزي فليك! فليك اللي كان لسه لاعب ساعتها في بايرن ووقف على خط المرمى بيحاول يمنع هدف ماجر، رجع بعد 37 سنه يلاقي نفسه مدرب على خط التماس، وبرضو واقف يتفرج على تورام وهو بيعيد نفس المشهد!
دفاع برشلونه كان تايه، وفليك ما عرفش يأمن الخط الخلفي، وتورام استغل الفرصه وسجل هدف جميل دخل التاريخ، وخلّى فليك يشوف الكعب مرتين، مره وهو لاعب ومره وهو مدرب. الدنيا دواره فعلاً!
