رامون طالع بقوة بعد غيابات روديغير وألابا.. ريال مدريد محتار!
في وقت بيغيب فيه روديغير وألابا عن دفاع ريال مدريد، ظهر اسم جاكوبو رامون بقوة، وبقى فيه كلام كتير حوالين فرصته ياخد مكان مع الكبار. صحيفة “آس” الإسبانية قالت إن النادي شايف فيه مدافع عنده موهبة جامدة وممكن يسد مكان الغايبين.
رامون واجه شوية إصابات عضلية في أول الموسم، بس رجع من الإصابة بشكل قوي جدًا، وبقى أساسي في كاستيا، الفريق الرديف للريال.
الغريب إن كل ما يلعب ماتش، الفريق ما بيخسرش! شارك في 15 ماتش، ما خسرش ولا واحد، والفريق استقبل 11 جون بس، يعني بمعدل أقل من جون في الماتش الواحد!
لكن لما غاب عن 19 ماتش تانيين، الوضع اختلف، والدفاع بقى مهزوز شوية، واستقبلوا 23 جون، بمعدل أكتر من جون في الماتش وده اللي خلّى ناس كتير جوا النادي تشوف إن الولد ده يستاهل فرصة مع الفريق الأول.
المدرب أنشيلوتي لسه عنده ثقة فيه، وقال: “الولد دفع تمن أول ماتش ليه، بس هو كويس جدًا وهيلعب أحسن، وأنا مقتنع بده.”
بس هنا المشكلة.. كاستيا داخل في صراع تقيل علشان يتأهل، والمدرب راؤول شايف رامون من الركايز الأساسية في الفريق فهل ريال مدريد هيستخدمه في الفريق الأول، ولا هيفضل مع كاستيا علشان يساعدهم يوصلوا لأهدافهم؟
الموضوع محتاج قرار، بس اللي باين إن رامون بيجهّز نفسه للخطوة الجاية.. وخلاص قرب ياخد فرصته الكبيرة.
