كاس الملك لبرشلونة.. بس ما ننسى فضل تشافي الكبير
الكل فرحان دلوقتي بكاس ملك إسبانيا اللي رجعت لخزينة برشلونة، وكل الناس بتتكلم عن هانز فليك وطريقته وأداء الفريق، بس في حاجه مهمه جدًا لازم ماننساهاش: الكاس دي جزء كبير منها بيروح لتشافي هيرنانديز.
تشافي يمكن ماكملش الموسم، بس هو اللي أسس كتير من الحاجات اللي شفنا نتيجتها دلوقتي وهو اللي أقنع كوندي يلعب ظهير، رغم إن الكل كان شايفه قلب دفاع. وهو اللي جاب رافينيا، وكان أول واحد راهن على فيرمين لوبيز، اللي بيقدم مستويات عاليه جدًا.
ما ننساش كمان إنه هو اللي ادى الفرصة لنجوم زي غافي وبالدي، وكان واثق فيهم من أول يوم. والكل فاكر إنه أول مدرب يطلع لامين جمال وباو كوبارسي، اللي بقوا دلوقتي ركايز أساسيه في الفريق.
تشافي استلم الفريق في وقت صعب، ماكنش فيه خيارات كتير، وكان لازم يعتمد على الشباب غصب عنه، بس بصراحه، عرف يكوّن فريق للمستقبل، حتى لو النتائج ماكنتش دايمًا مرضيه.
وعلى سيرة المباريات، ناس كتير مركزه دلوقتي على ماتش العودة ضد إنتر، وبعده الكلاسيكو، والديربي، بس بصراحه، أكتر ماتش يخوف هو اللي جاي ضد بلد الوليد. الفريق ده هبط خلاص، ومعندوش حاجه يخسرها، وده أخطر نوع من الخصوم.
اللاعبين لازم يدخلوا الماتش مركزين، ومايفكروش في أي حاجه غير الفوز والكوره متعرفش حسابات، واللي يستهين بخصمه ممكن يندم في الآخر.
