فليك في ورطه قبل ماتش إنتر بسبب أخطاء تشيزني المتكرره
برشلونه داخل على واحد من أهم الماتشات في تاريخه القريب، ماتش العوده ضد إنتر في نصف نهائي دوري أبطال أوروبا، والمشكله الكبيره دلوقتي مش في الدفاع ولا الهجوم، لكن في مركز حساس جدًا: حراسة المرمى.
الحارس البولندي فويتشيك تشيزني، اللي جاي بخبره كبيره وماضي قوي في الكالتشيو، بقى مصدر قلق لكل الجماهير البرشلونيه، وخصوصًا بعد الأداء المتذبذب اللي بيقدمه من فتره وفي كل مره الفريق يوصل لمرحله حساسه، بنلاقي غلطه من تشيزني بتكلفنا كتير، وده حصل قدام دورتموند وإنتر وبيتيس وسيلتا، وحتى في نهائي الكأس ضد ريال مدريد.
الغلطات دي مش بس على مستوى التصديات، لكن كمان في الكرات العرضيه والثابته، وده بيخلي أي هجمه على مرمى برشلونه تبدو خطيره أكتر من اللازم.
صحيفة “آس” الإسبانيه قالتها بصراحه: مافيش بقى حاجه اسمها “هامش للخطأ”، وفليك لازم يقرر بسرعه. يا يشوف طريقه يصحّح بيها أداء تشيزني نفسيًا وتكتيكيًا، يا ياخد قرار شجاع ويفكر في بديل قبل فوات الأوان.
الجمهور مش ناقص توتر أكتر، خصوصًا قبل ماتش في ميلانو ضد فريق شرس زي إنتر، اللي بيستغل أنصاف الفرص، ومابيغفرش لأي هفوه.
كل العيون دلوقتي على فليك… هل هيجازف ويكمل بتشيزني؟ ولا حياخد قرار ممكن يغيّر مسار الموسم كله؟
