أنشيلوتي لسه ممكن يدرب البرازيل بس مستني قرار مصيري
رغم الأخبار اللي طلعت قبل كده عن فشل الصفقه، تقارير إعلاميه رجعت تأكد إن المدرب الإيطالي كارلو أنشيلوتي لسه عنده فرصه يقود منتخب البرازيل الفتره الجايه، بس الموضوع لسه مش محسوم بشكل نهائي.
صحيفة ماركا الإسبانيه قالت إن أنشيلوتي مرفضش عرض البرازيل، لكن بلغهم إنه محتاج يحدد الأول هيفضل مع ريال مدريد ولا هيمشي بعد نهاية الموسم، رغم إن عقده ممتد لحد 2026.
الأنباء بتقول إنه غالبًا مش هيكمل مع الريال، والتقارير بتشير إن تشابي ألونسو، مدرب ليفركوزن، هو اللي ممكن ياخد مكانه.
ريال مدريد خرج من دوري الأبطال، وخسر نهائي الكأس قدام برشلونة، ولسه بيحاول ينافس على الدوري رغم إنه متأخر عن برشلونة بـ4 نقط، وكمان عنده بطوله كأس العالم للأنديه في يونيو ويوليو.
البرازيل اللي أنهت علاقتها مع المدرب دوريفال جونيور في مارس، بتفكر تبدأ مع أنشيلوتي في تصفيات كأس العالم اللي هتبدأ يونيو.
ماركا كمان وضحت إن أنشيلوتي مش طالب أي تعويض لو مشي من الريال، وإن علاقته مع فلورنتينو بيريز كويسه ومفيش أي خلاف.
