ليفربول عينه على إيزاك والصفقة مربوطة بمصير نيوكاسل الأوروبي
نادي ليفربول مكمل في سعيه لدعم هجومه في الصيف، وحاطط عينه على المهاجم السويدي ألكسندر إيزاك نجم نيوكاسل يونايتد، واللي تألق بشكل لافت الموسم ده موقع TEAMtalk العالمي قال إن إيزاك على رأس أولويات إدارة الريدز خصوصًا بعد احتمالية رحيل داروين نونيز.
اللاعب عنده 25 سنة، وقدم موسم قوي جدًا، لعب 39 ماتش وسجل فيهم 26 جول وصنع 6 كمان، وكان ليه دور كبير في تتويج نيوكاسل بكأس الرابطة على حساب ليفربول بعد ما كسبوهم 2-1 في النهائي.
لكن في عقبة كبيرة قدام الصفقة، وهي إن نيوكاسل مش ناوي يفرط فيه بسهولة، وبيطلب 130 مليون باوند عشان يسيبوه، وكمان عقده لسه ممتد لحد 2028.
التقرير كمان وضّح إن أمل ليفربول الوحيد في حسم الصفقة دي، هو إن نيوكاسل يفشل في التأهل لدوري الأبطال الموسم الجاي، ساعتها ممكن الإدارة تفكر تبيع نجم أو اتنين عشان توازن ماليتها.
دلوقتي نيوكاسل في المركز التالت بـ62 نقطة، ولسه الصراع شغال على المراكز المؤهلة للتشامبيونزليج.
