الكابتن يرجع يتصدر تاني بعد رمضان ويحقق مشاهدات عاليه أوي
مسلسل الكابتن اللي من بطولة أكرم حسني وآيه سماحه، رجع تاني يتصدر المشاهده على منصه Watch It بعد ما بدأ عرضه التاني بعد رمضان، واحتل المركز التاني وسط تفاعل كبير من الناس اللي بدأت تتابعه من جديد.
المسلسل كان في أول نص من رمضان في المركز الأول، وبعد كده نزل للمرتبه الرابعه في النص التاني، بس دلوقتي رجع تاني المركز التاني، وده بيوضح إنه لسه محقق شعبيه ومشاهدات عاليه حتي بعد ما خلص الموسم.
صناع العمل قالو إنهم فرحانين جدًا من رد فعل الجمهور، سواء من المشاهدات أو تعليقاتهم على السوشيال ميديا، وإن هدفهم من البدايه كان تقديم حاجه تفرّح الناس وتجمع العيله كلها قدام التليفزيون.
المنتج كريم أبو ذكري قال إن التحدي الحقيقي كان إن الكوميديا تكون من الموقف مش من الإفيهات السطحية أو الخارجه، وده خلّى العمل مناسب لكل الأعمار، علشان كده اتصنف لجمهور عام
المسلسل من تأليف عمرو الدالي، وإخراج معتز التوني، ومن قصه أيمن الشايب، وشارك في البطوله كمان سوسن بدر، سامي مغاوري، رحمة أحمد، محمد رضوان وضيوف شرف كتير زي شيكو ومحمد أنور.
