نهائي كاس مصر بين الزمالك وبيراميدز هيتلعب في الإمارات
مصدر من اتحاد الكوره كشف انهم خلاص استقرو على ميعاد ومكان نهائي كاس مصر بين الزمالك وبيراميدز، واللي هيتلعب يوم 5 يونيو الجاي بدل من الموعد القديم اللي كان يوم 20 مايو.
الماتش هيتلعب في ملعب محمد بن زايد بنادي الجزيره في الإمارات، وده بسبب ان بيراميدز مرتبط بلعب نهائي دوري أبطال أفريقيا قدام صنداونز الجنوب أفريقي.
بيراميدز هيلعب الذهاب قدام صنداونز يوم 24 مايو في جنوب أفريقيا، وبعدين هيلعب الإياب في ملعب الدفاع الجوي يوم 1 يونيو، عشان كده صعب يلعب نهائي كاس مصر بعدها بيومين بس، فتم تأجيله.
المصدر كمان قال إن في مفاوضات دلوقتي مع الشركه الراعيه بخصوص المقابل المادي، وكمان بيتم التفاهم على المكافآت اللي هتكون للفريق اللي هيفوز بالكاس واللي هيطلع وصيف.
ده غير إن المباراة هتكون مهمه جدًا للفريقين، خصوصًا إن الزمالك عايز يحقق بطوله في الموسم ده، وبيراميدز بيعيش أفضل فتراته فنياً وعايز يخطف الكاس كمان بعد وصوله لأول نهائي أفريقي في تاريخه.
