برشلونة داخل على شهر نار.. 7 مواجهات ممكن تغيّر مصير الموسم!

تاريخ النشر: منذ 6 ساعة

🖊️ Rodyna Emad Elmansy

📷 فريق برشلونة الإسباني

برشلونة بيستعد يدخل على شهر مايو وهو محمّل بمباريات نارية ومصيرية، ممكن تغيّر شكل موسمه بالكامل، سواء في الدوري الإسباني أو في دوري أبطال أوروبا والفريق الكتالوني عنده جدول نار، وفيه 6 ماتشات في الدوري وماتش ممكن يكون النهائي الحلم في الشامبيونزليغ!

الضغط كبير والكل مستني يشوف هل هانز فليك هيقدر يقود الفريق بنجاح وسط الجدول المشتعل ده، ولا لا.

جدول ماتشات برشلونة في مايو:

3 مايو (السبت): ريال بلد الوليد – برا ملعبه
ماتش لازم يتاخد بجدية، 3 نقاط مهمين قبل بداية المواجهات الكبيرة.
6 مايو (الثلاثاء): إنتر ميلان – في نصف نهائي دوري الأبطال، برا ملعبه
قمة أوروبية من العيار التقيل، وأي غلطة هتفرق كتير في حلم الوصول للنهائي.
11 مايو (الأحد): ريال مدريد – على ملعب مونتجويك
الكلاسيكو! ماتش الموسم، واللي ممكن يحدد مصير الليغا.
15 مايو (الخميس): إسبانيول – برا ملعبه
ديربي كتالونيا، ومش سهل أبدًا، خصوصًا في ظل الإرهاق.
18 مايو (الأحد): فياريال – على ملعب مونتجويك
فياريال دايمًا خصم مزعج، والماتش جاي بعد ضغط كبير.
25 مايو (الأحد): أتلتيك بلباو – برا ملعبه
رحلة صعبة في سان ماميس، وقبلها الفريق ممكن يكون بيصارع على الصدارة.
31 مايو (السبت): نهائي دوري أبطال أوروبا
لو برشلونة عدّى إنتر، هيكون في النهائي، وساعتها كل العيون على لقب الحلم!

اللي واضح إن برشلونة داخل على شهر ماينفعش فيه أي غلط، كل ماتش كأنه نهائي.
الفريق محتاج تركيز، جهد بدني عالي، وتدوير ذكي من فليك علشان يخرج بأكبر مكاسب ممكنة.