فضيحة كورفا نورد تضرب الكورة الإيطالية وتورّط لاعيبة ومسؤولين كبار
الدنيا ولّعت في الكورة الإيطالية بعد ما انفجرت فضيحة جديدة اسمها “كورفا نورد”، وطلعت بلاوي كتير عن علاقت روابط الألتراس بتوع إنتر وميلان بعالم الجريمة والمافيا!
النيابة العامة للاتحاد الإيطالي دخلت على الخط، والمدرب سيموني إنزاغي ومعاه هاكان تشالهان أوغلو لاعب إنتر، حبّوا يخلصوا نفسهم بسرعة ووقّعوا اتفاق مع النيابة علشان يهربوا من المحاكمة الرياضية وبس ده ما منعش إنهم يتعاقبوا ويتغرموا، والمدرب خد غرامة 15 ألف يورو، وتشالهان أوغلو دفع 30 ألف! وكمان الاتنين هيغيبوا عن ماتش إنتر الجاي قدام هيلاس فيرونا.
التحقيق اسمه “Doppia Curva”، وبيتكلم عن علاقات خطيرة بين الألتراس والمافيا، وبيقال إن في جرائم قتل اتعملت وسط الصراع على الزعامة بين روابط المشجعين!
ومش بس إنزاغي وتشالهان أوغلو اللي اتعاقبوا، لأ ده إنتر نفسه اتغرم 70 ألف يورو عشان خمس مخالفات، وميلان كمان خد غرامة 30 ألف! وزانيتي، نائب رئيس إنتر، اتغرم هو كمان 14,500 يورو واتوقف 30 يوم، زيه زي مسؤولين الأمن في الناديين.
أما بالنسبة لجوزيبي ماروتا، رئيس إنتر، فنجا من العقوبة بعد ما النيابة تأكدت إن اجتماعه سنة 2022 مع الألتراس كان بالتنسيق مع السلطات وعلشان يهدوا الأوضاع.
الغريب بقى إن تشالهان أوغلو اعترف إنه كان على علاقة بماركو فيرديكو، زعيم الألتراس اللي دلوقتي محبوس بقضايا مافيا، وكمان قابل أندريا بيلوكو، اللي اتقتل بعدين على يد زعيم تاني بقى شاهد على كل المصايب دي!
الدنيا لسه فيها كتير، ولسه التحقيقات شغالة، خصوصًا إنهم هيستدعوا دافيدي كالابريا، لاعب ميلان السابق، اللي بيلعب دلوقتي مع بولونيا، علشان يدلي بشهادته.
