ناهد السباعي تدافع عن أخوها بعد أزمة جنازة سليمان عيد
طلعت الفنانه ناهد السباعي بتصريحات جديده بتدافع فيها عن أخوها المخرج محمد السباعي وزوجته آيه سماحه، بعد الهجوم اللي اتعرضوله بسبب كلامهم عن المصورين في جنازة الفنان الراحل سليمان عيد.
ناهد قالت في لقاءها مع برنامج “ET بالعربي”: “أنا معاهم قلبًا وقالبًا، بس بتكلم عن نفسي، أنا مش ضد توثيق جنازة نجم كبير، بس ضد تصوير الكفن والميت وهو نازل القبر، دا حرام في ديننا وميت له حُرمه”.
وأضافت: “أنا ماتلي ناس كتير، وكنت في جنازات، وشكلي بيبقى وحش، وبيتصور، ومع إني ليّا حق أرفض، بس المشكلة إننا بقينا نعمل حاجات حرام عشان الريتش والفولورز، بقينا قاسيين”.
كمان اتكلمت عن اللي بيعذبوا الحيوانات أو يصوروا موتى للترند، وقالت: “دي حاجه قاسيه ومش كل الناس بتحب دا”.
وعن الألفاظ اللي قالها أخوها عن المصورين، قالت ناهد: “وقت الزعل بيطلع كلام كده، وأنا معاه في كل حاجه”.
وكان محمد السباعي نشر صور للمصورين من الجنازه وعلق عليهم بألفاظ مسيئه، ومراته آيه سماحه دعّمته، وبعد الهجوم، طلعوا يعتذروا.
