أحمد عبد الوهاب: أنا متنمر وبضحك على مراتي علني ومش شايفها تنمر
قال الفنان أحمد عبد الوهاب خلال ظهوره في بودكاست “فايق ورايق” مع الإعلامي إبراهيم فايق، إن كلمة “تنمر” بالنسباله غريبة ودخيلة علينا، وإن كل ده في الآخر هزار مش أكتر، حتى لو فيه سخرية من الشكل أو الصوت.
وأضاف عبد الوهاب: “أنا شخصيًا متنمر، وبحب أتنمر على مراتي أكتر حد في حياتي، هي صوتها عالي وعندها لدغة في حرف الراء، وده بيخلينا دايمًا نضحك سوا، وبقولها الكلام ده عادي جدًا”، ووضح إن ده بالنسباله هزار مش تنمر خالص.
وسرد موقف حصل مع مراته وهي في فرنسا، وازاي ماكنش فاهم هي بتقول إيه من طريقة نطقها، وقال: “قالتلي عااء عااء، قولتلها بوليس؟ قالتلي يا ظريف، طلعت تقصد عرق عرق”، وسخر من نطقها وقال إنه بيفضل يضحك من المواقف دي.
كمان قال إنه مراته صححته في أغنية لأحمد سعد وقالتله الكلمة “موكب” مش “مركب”، مع إنه شايف نطقها هي كمان مش واضح.
والجدير بالذكر إن عبد الوهاب شارك في تلات مسلسلات برمضان 2025، وهم “الكابتن”، و”كامل العدد ++”، و”أشغال شقة جدًا”.
