ليفركوزن بيقرب من تين هاج وألونسو ممكن يطير للريال
باير ليفركوزن الالماني شكله بيجهز للمرحله الجايه، وبدأ فعلاً يتحرك عشان يتعاقد مع المدرب الهولندي ايريك تين هاج، لو مدربه الحالي تشابي ألونسو مشي فـ نهايه الموسم، كدا قالت تقارير صحفيه منهم مجله كيكر الألمانيه.
المدرب الهولندي عنده 55 سنه، ودرب قبل كدا فرق كبيره زي اياكس الهولندي ومانشستر يونايتد الإنجليزي، والمفاوضات وصلت لمرحله متقدمه بينه وبين ليفركوزن، اللي بيدور على انتقال سلس فـ حال رحيل ألونسو.
ألونسو، اللي استلم الفريق من أكتوبر 2021، حقق معاهم موسم أسطوري، أخد الدوري والكأس من غير ولا هزيمه، إنجاز أول مره يحصل فـ تاريخ النادي، بس اسمه دلوقتي داخل بقوه لتدريب ريال مدريد، خصوصا لو أنشيلوتي مش كمل.
رغم إن عقد ألونسو مستمر لحد 2026، بس فيه بند يسمحله يمشي بدري لو جات فرصه من نادي معين، والريال منهم.
تين هاج عنده خبرات كتير، خد 3 دوري مع أياكس وكأسين، وكمان درب مانشستر وخد معاهم بطولات زي كأس الرابطة والاتحاد، واتشال من منصبه أكتوبر اللي فات.
كمان سبق ودرب الفريق الرديف لبايرن، يعني عنده خلفيه كويسه عن الكوره الألمانيه.
