جماهير مدريد تفتقد خوسيلو والبدلاء مايعطو الإضافه المطلوبه حالياً
كل مشجع مدريدي لسه يفتكر هدفي خوسيلو اللي سجّلهم ضد بايرن ميونخ، واللي خلّو ريال مدريد يوصل نهائي دوري الأبطال بطريقه دراميه لا تُنسى.
دخل وقتها من الدكه وقلَب النتيجه وكتب إسمه في التاريخ، بس من بعدها راح، ومافي أحد قدر يعوّض مكانه كبديل حاسم.
صحيفة آس الإسبانيه نشرت تقرير بيأكد إن خوسيلو كان حاله نادره في منظومة الريال، لأنه لوحده سجّل 5 أهداف كبديل من أصل 18 له الموسم الماضي، 3 منها بدوري الأبطال، بينهم هدف مهم قدّام نابولي.
لكن باقي بدلاء مدريد؟ مساهمتهم ضعيفه مرّه. الموسم الماضي سجلوا 13 هدف بس، وخوسيلو لحاله 5 منهم.
والموسم هذا أسوأ، سجلوا 12 هدف فقط، 4 منهم في الدوري من أصل 66 هدف للفريق، يعني حوالي 6% بس!
مقارنه بباقي فرق أوروبا، بدلاء مدريد يعتبروا من الأضعف تهديفياً، وحتى فرق زي لوهافر وإيفرتون قريبين منهم.
أتلتيكو مدريد مثلاً، بدلاءه مسجلين 34% من أهدافه. فيه لمحات حلوه من إندريك ومبابي بكأس الملك، بس الوضع العام مقلق.
