تامر حسني وهنا الزاهد راجعين بفيلم ريستارت نهاية مايو الجاي
اعلنت السينمات إنها هتستقبل فيلم ريستارت بطولة النجم تامر حسني والجميله هنا الزاهد يوم ٢٩ مايو اللي جاي، والفيلم من تأليف أيمن بهجت قمر وإخراج ساره وفيق وبيعتبر من الأعمال المنتظره جدًا في موسم الصيف.
الجميل إن فيه ضيوف شرف هيكون ليهم حضور قوي في الفيلم، زي الكابتن ميدو، ورانيا منصور، وشيماء سيف، والفنانه الكبيره إلهام شاهين وبيشارك كمان في البطوله بجانب تامر وهنا، كل من باسم سمره، ومحمد ثروت، وعصام السقا، وغيرهم كتير.
الفيلم ده بيعتبر التعاون التاني بين تامر وهنا، بعد ما عملوا سوا فيلم بحبك اللي نزل في ٢٠٢٢ وحقق وقتها نجاح كبير وكان من تأليف وإخراج تامر نفسه.
أما المخرجه ساره وفيق، فده مش أول تعاون ليها مع تامر، اشتغلت معاه قبل كده في فيلم مش أنا سنة ٢٠٢١، وكان معاه حلا شيحه، وسوسن بدر، وماجد الكدواني، وفيلم تاج اللي كان معاه دينا الشربيني وهاله فاخر وغيرهم.
الكل مستني يشوف الفيلم الجديد هيكون عامل إزاي، خصوصًا إنه بيجمع تاني تامر وهنا بعد نجاحهم سوا قبل كده.
