ديمبلي يصاب بعد هدفه ضد أرسنال وموقفه من الإياب مجهول
اعلن نادي باريس سان جيرمان عن تفاصيل إصابة النجم الفرنسي عثمان ديمبلي، بعد ما خرج مصاب من ماتش فريقه ضد أرسنال في دوري أبطال أوروبا، اللي اتلعب يوم التلات اللى فات وفاز فيه باريس 1-0 بهدف من ديمبلي نفسه.
النادي قال في بيان رسمي النهارده الجمعه إن ديمبلي عنده إجهاد في عضله الفخد الخلفيه، لكن الحاله بتتحسن وبتتطور بشكل إيجابي، وده طمن الجماهير شويه.
لويس إنريكي، مدرب باريس، وضّح إن ديمبلي مش هيشارك في ماتش ستراسبورج اللي هيتلعب بكره السبت في الدوري الفرنسي، لكنه مردش يقول إذا كان هيلحق يشارك في لقاء الإياب ضد أرسنال ولا لأ، وقال هيتم الإعلان عن حالته لاحقًا.
ديمبلي قدم موسم كبير مع باريس، لعب 45 مباراه وسجل 33 هدف وصنع 12، وبقى عنصر مهم في تشكيلة الفريق.
الإصابة دي جات في وقت حساس جدًا، وباريس محتاج كل لاعبيه، خصوصا إن الماتش الجاي قدام أرسنال هيكون حاسم لمصير التأهل للنهائي.
الجماهير مستنيه تشوف إذا كان ديمبلي هيقدر يرجع بسرعه ولا لأ
