مدرب الأهلي يلغى فكرة المعسكر قبل نهائي آسيا ضد كاواساكي
في قرار مفاجئ شوي، قرر مدرب الأهلي ماتياس يايسله إنه ما يسوي معسكر مغلق قبل نهائي دوري أبطال آسيا اللي بيكون ضد كاواساكي فرونتال الياباني، يوم السبت على ملعب الجوهرة المشعة بجدة.
وبحسب تقارير صحفيه، الفريق راح يتدرّب اليوم الجمعه على ملعب النادي، وبعد التمرين اللاعبين بيروحون بيوتهم بدون الدخول في معسكر داخلي، وهذا شي نادر قبل مباراة نهائيه بحجم آسيا.
يايسله شكله واثق من تركيز لاعبينه، ويفضّل الراحة النفسيه بدل ضغط المعسكر، خصوصًا إن اللاعبين عايشين أجواء النهائي من أيام، والتدريبات كانت مكثفه.
التجمع بيكون صباح يوم السبت في فندق الهيلتون بجده الساعة 10 الصبح، بعدها راح يصير الإجتماع الفني في تمام الساعة 4 العصر، بعدها بياخذون وجبه خفيفه، ويتوجّهون للملعب.
الجماهير الأهلاويه تنتظر النهائي على أحر من الجمر، وتبغى تشوف الكأس يرجع جده، بس السؤال: هل قرار عدم المعسكر بيكون في مصلحة الفريق؟ ولا ممكن يأثر سلبًا على التركيز؟
الجواب بيكون من أرضية الجوهرة يوم السبت!
