رانيا المشاط: شغالين على خطه جديده للنمو وزيادة فرص الشغل
الدكتوره رانيا المشاط، وزيرة التخطيط والتنمية الاقتصادية، قالت إن الوزاره دلوقتي بتشتغل مع باقي الوزارات على إعداد خطه تنفيذيه قويه علشان تزود معدلات النمو وتفتح فرص شغل جديده والكلام ده جه في تعليقها على مخرجات لجنة التنمية اللي اتعقدت بحضورها وبمشاركة رئيس البنك الدولي أجاي بانجا ومديرة صندوق النقد كريستالينا جيورجيفا.
المشاط وضحت إن الخطه دي هتركز على كذا قطاع مهم زي الاستثمار الأجنبي المباشر، والتنمية الصناعيه، والتجارة، وسوق العمل، علشان نقدر نوصل لاستقرار اقتصادي حقيقي وكمان التعاون شغال على مستوى عالي مع البنك الدولي اللي يعتبر شريك للمعرفه في المجال ده.
وقالت كمان إن مصر حاطه في أولوياتها تمكين القطاع الخاص، لأنه هو المحرك الأساسي للنمو وتوفير الوظايف ومن ضمن القطاعات اللي هياخدوا اهتمام خاص: السياحة، والصناعات التحويليه اللي مالهاش علاقه بالبترول، وقطاع الأعمال الزراعيه.
كمان الوزاره بتشتغل على توسيع الشراكة مع البنك الدولي، خصوصًا من خلال برنامج “J-CAP” علشان يدعموا أسواق المال المحليّه، وده بيتم كمان بالتعاون مع مؤسسة التمويل الدولية وفيه برامج كتير شغاله مع مؤسسات التمويل الدوليه، ومع جهاز المشروعات الصغيرة والمتوسطة، علشان يفتحوا فرص تمويليه أكبر للمشروعات المختلفه.
اللجنه أكدت إن خلق فرص شغل هو أولويه قصوى، وإن الحل لازم يكون من خلال ريادة الأعمال، وتشجيع القطاع الخاص، وكمان بناء بيئة تشجع الاستثمار، وتحسين التعليم والصحه والتغذيه وتنمية المهارات.
اللجنه أشارت كمان إن الشركات الصغيرة والمتوسطة (MSMEs) ليها دور مهم جدًا، لأنها بتشكّل 90% من الشركات وبتوظف حوالي تلات تربع الناس في الدول الناميه.
وأخيرًا، البنك الدولي ناوي يوسّع برنامج J-CAP علشان يدعم أكتر أسواق رأس المال في الدول، ويكثف أنشطته ويوسّع شغله مع الدول اللي محتاجه دعم اقتصادي حقيقي.
