توقعات فيتش: الاقتصاد المصري رايح في طريق التحسن السنين الجايه
في تقرير جديد من وكالة “فيتش سوليوشنز”، التوقعات بتقول إن الاقتصاد المصري هيشهد تحسن تدريجي من السنة الماليه 2024/2025 لحد 2027/2028، وده بفضل السياسات والإصلاحات اللي الحكومة ماشيه فيها بخطوات محسوبه.
الوكاله بتتوقع إن الإيرادات العامه هتزيد بنسبة 38.5% في الفتره دي، وده معدل أعلى من معدل الزياده في المصروفات اللي متوقع توصل لـ30.6% والفرق ده معناه حاجه مهمه جدًا: الحكومة هتبقى قادره تقلل من العجز المالي تدريجيًا.
فيتش كمان رجحت إن عجز الموازنه كنسبه من الناتج المحلي هيقل بحوالي 1.6 نقطة مئوية، ودي حاجه بتطمن. كمان الدين الحكومي ممكن ينزل ويوصل لـ50.2% من الناتج المحلي بحلول سنة 2033/2034، يعني فيه تحسن واضح في إدارة الديون.
البيانات دي بتأكد إن الإصلاحات اللي بتعملها الدولة مش مجرد كلام، لكن ليها مردود فعلي على الأرض، سواء في استقرار الاقتصاد أو في تحقيق الاستدامة الماليه اللي البلد محتاجاها بشده.
للي ميعرفش، “فيتش سوليوشنز” دي واحدة من الشركات التابعة لمجموعة فيتش جروب، وبتقدم تحليلات اقتصاديه وماليّه عميقه للدول والأسواق ولكن خلّي بالك، هي غير “فيتش للتصنيف الائتماني” اللي بتقيم الجدارة الائتمانيه للدول والشركات.
“فيتش سوليوشنز” بتشتغل أكتر على التوقعات والرؤى الاقتصاديه، وده اللي بيخليها مرجع مهم للحكومات والمستثمرين اللي بيخططوا على المدى الطويل.
