هانز فليك يخطف القلوب بحركة إنسانية قدّام جماهير برشلونة
في وقت برشلونة بيمر بظروف مش سهلة، ظهر المدرب الألماني هانز فليك بصورة كلها احترام وتواضع قدّام جماهير الكتلان، وده قبل ماتش بلد الوليد، لما عمل حاجة بسيطة بس كبيرة في معناها.
الراجل وهو طالع من فندق الإقامة، شاف الجماهير محتشدة برا، ناس واقفة بالساعات عشان بس يشوفوه أو ياخدوا توقيع منه وفليك ما طنّشهمش ولا دخل بسرعة، بالعكس، وقف معاهم أكتر من 10 دقايق، يوقّع صور وتيشيرتات ويتصوّر معاهم، وده وسط تدافع الناس وفرحتهم بيه.
واللي لفت الأنظار أكتر، إنه بنفسه وقف يثبت السياج الحديدي اللي كان هيتكعبل بسبب الزحمة، عشان يحمي الجماهير، وده خلا حتى الحرس المدني يبصّله بإعجاب.
الصحافة الكتالونية ما سكتتش، وخصوصًا “موندو ديبورتيفو”، اللي وصفت فليك بالمدرب القدوة، وقالت إن عمره 60 سنة بس قلبه شاب ومليان إنسانية.
بيدري ورافينيا كمان كانوا موجودين وساعدوا في رسم البسمة على وشوش الجماهير، بس طلب منهم يرجعوا عشان التزامات الفريق، في حين فليك فضّل يكمل معاهم شوية كمان، وكأنه بيقولهم “أنا منكم وليكم”.
اللي عمله فليك مش بس حركة حلوة، لكن رسالة واضحة إن برشلونة مش بس نادي، ده كيان بيحترم كل فرد فيه من المدرب للجمهور.
