قرارات عشوائية وإدارات متخبطة.. النصر يضيع بطولاته بإيده
الوضع داخل نادي النصر السعودي بقى مقلق جدًا، وده مش مجرد وجهة نظر جماهيرية أو ردة فعل على خسارة بطولة، ده واقع بيثبته الأرقام والنتايج، النادي الكبير اللي اسمه “العالمي” خسر 32 بطولة من أصل 36 شارك فيها آخر كم سنة، وكسب بس 4!
السبب؟ إدارة ماشية من غير خطة واضحة، كل شوية تغيير مدربين، وتعاقدات غريبة مع لاعبين مالهمش أي تأثير فعلي. تخيل من بعد روي فيتوريا اللي مشي في ديسمبر 2020، مر على الفريق 10 مدربين في 5 سنين! يعني تقريبا كل 5 شهور بيجيبوا مدرب جديد.
المدربين جم ومشيوا بالهبل، من ألين هورفات لحد ستيفانو بيولي، والنتيجة؟ عدم استقرار فني خلى الفريق ما يعرفش يثبت على أسلوب لعب أو شخصية قوية في الملعب.
وما ننساش اللاعبين المحليين، للأسف مافيش معايير واضحة للتجديد، لاعب ممكن يقدم ماتشين كويسين في الموسم وياخد عقد 4 سنين! باستثناء أيمن يحيى، أغلب المحليين أداؤهم باهت ومش بيصنعوا الفارق.
أما الأجانب، فحدّث ولا حرج، في الموسم ده بس، الإدارة تعاقدت مع 4 أجنحة ومهاجمين، رغم وجود كريستيانو رونالدو، وكل ده من غير ما يدعموا الوسط اللي كان واضح إنه نقطة ضعف!
الوضع محتاج وقفة، مش بس من الإدارة، من جمهور النصر كمان اللي لازم يطالب بخطة واضحة، وبناء فريق بعقل مش بالعاطفة. النصر عنده كل شيء يوصله للبطولات: جمهور، فلوس، نجوم، بس اللي ناقص هو “الإدارة الصح”.
لو الإدارة ما رجعتش للطريق الصح، هنفضل نشوف نفس الفيلم كل سنة: طموحات كبيرة، نتائج مخيبة، ومدرب جديد!
