تير شتيغن وتشيزني مع بعض في برشلونة؟ ده اللي حصل!
في مشهد مش مألوف خالص، لقينا اسمي تير شتيغن وتشيزني سوا في قائمة برشلونة لماتش الليلة! وده غريب لأن تشيزني أصلاً جاي علشان يعوّض غياب شتيغن اللي اتصاب إصابة كبيرة في سبتمبر اللي فات قدام فياريال، والكل وقتها افتكر إن الألماني هيغيب باقي الموسم.
بس بقى، الموضوع ليه تفسير قانوني واضح حسب صحيفة “موندو ديبورتيفو”. القانون الإسباني، وتحديدًا المادة 77 من لائحة الميزانية في الليغا، بيسمح لأي نادي يسجّل لاعب بديل في حالة وجود إصابة طويلة للاعب تاني (يعني إصابة أكتر من 4 شهور) وده اللي حصل بالضبط مع تير شتيغن اللي اتصاب يوم 22 سبتمبر وعمل عملية وغيّبته شهور.
بعد شهر من الإصابة، برشلونة بعت تقرير طبي كامل لليغا، واللجنة الطبية وافقت عليه، وساعتها قدر يسجل تشيزني ويستخدم 80% من راتب شتيغن لتغطية عقد الحارس البديل.
لكن الحتة اللي معظم الناس مش واخدة بالها منها، إن القوانين مش بتجبر النادي يحذف اسم اللاعب المصاب بعد ما يرجع! فبالتالي دلوقتي الاتنين يقدرو يكونوا في القائمة المحلية للفريق لحد نهاية الموسم.
بس في أوروبا؟ لأ، الموضوع مختلف! قوانين اليويفا مش مرنة زي الليغا، ولازم برشلونة يشيل اسم تشيزني علشان يرجّع تير شتيغن في قائمة دوري الأبطال، مفيش مجال للاثنين مع بعض هناك.
يعني اللي حصل ده قانوني 100%، بس مش كتير من الجماهير كانت عارفة التفاصيل دي!
