ريال مدريد داخل على جيوكيريس بقوة ولو رودريغو مشي خلاص!
ريال مدريد مش ناوي يسيب الساحة فاضية في الصيف، وكل يوم طالع اسم جديد بيرتبط بيه في الميركاتو. وآخر واحد دخل على رادار الملكي هو المهاجم السويدي فيكتور جيوكيريس، نجم سبورتينغ لشبونة البرتغالي، اللي عامل موسم ناري وخاطف الأنظار من الكل.
وبحسب الصحفي الموثوق فلوريان بليتينبيرغ من “سكاي سبورتس”، الريال بيجهّز نفسه لصفقة تقيلة ممكن تكلفه ما بين 60 لـ70 مليون يورو وفي كلام كده بيقول إن فيه اتفاق شفهي حصل بين اللاعب وإدارة سبورتينغ، والريال مستني الفرصة يخلّص.
بس القصة مش سهلة، لأن فيه منافسة جامدة من أرسنال وتشيلسي ومان يونايتد، في حين بايرن ميونخ خرج من السباق بسبب سعر الصفقة اللي شايفينه مبالغ فيه.
اللي مخلّي الريال يتحرك بالسرعة دي إن فيه احتمال كبير إن رودريغو يمشي في الصيف وساعتها، جيوكيريس هيكون الحل الجاهز علشان ياخد مكانه كرأس حربة صريح، وسط وجود فينيسيوس ومبابي على الأجنحة، يعني التشكيلة هتبقى مولعة نار لو الصفقة تمت!
ريال مدريد بيشتغل على أكتر من جبهة، بس الواضح إن جيوكيريس داخل دماغهم، وممكن يبقى مفاجأة الصيف لو الأمور مشت زي ما هما عايزين.
