صداقه لامين جمال وآدم أزنو تتحول لتنافس في مباراة برشلونة
النهارده في مباراة غير متكافئة على الورق بين برشلونة المتصدر وبلد الوليد اللي في ذيل الترتيب، الأنظار هتكون متوجهة لمباراة خاصة جدًا وليه؟ لأنه في صراع مش بس بين الفريقين، لكن كمان بين صديقين سابقين، تحولوا من أصدقاء في الطفولة لمنافسين على أرضية الملعب.
وفقًا لصحيفة “آس” الإسبانية، آدم أزنو، الظهير الأيسر الشاب المعار من بايرن ميونخ لبلد الوليد، هيتولى مهمة مراقبة لامين جمال، نجم برشلونة الصاعد، على الجهة اليمنى. والمثير إن الاتنين، اللي تربوا في نفس الحي في مدينة ماتارو الإسبانية، كانوا مع بعض في أكاديمية “لا ماسيا” لحد ما أزنو راح بايرن ميونخ في 2022.
أزنو، رغم قلة خبرته، بدأ يظهر في التشكيلة الأساسية لبلد الوليد بعد انتقاله في يناير، ولعب 9 مباريات حتى الآن، وأظهر إمكانيات هجومية حلوة، رغم معاناته الدفاعية في بعض الأوقات ورغم كل ده، أزنو لسه شاب وعنده فرصة يثبت نفسه أكتر في المباريات الجاية.
المثير في الأمر كمان إن الصديقين اختاروا مسارات دولية مختلفة، لامين اختار منتخب إسبانيا بينما آدم فضل منتخب المغرب بعد ما كان في أكاديميات إسبانيا ورغم دا كله، علاقتهم ما تأثرتش، بل حتى أزنو دعم صديقه في بطولة أوروبا الأخيرة.
النهارده هيتواجهوا لأول مرة على أرض الملعب، وبينهم تحدي خاص جدًا والمباراة مش بس عن الفوز بالنقاط، لكن عن اثبات وجودهم كأبطال على أرضية الملعب.
