استبعاد رودريجو جوس من ماتش سيلتا فيجو يثير تساؤلات الجماهير
مفاجأة حصلت في ريال مدريد قبل ماتش سيلتا فيجو، لما أعلن المدرب الإيطالي كارلو أنشيلوتي قائمة الفريق من غير البرازيلي رودريجو جوس، وده عمل لغط كبير حوالين سبب غيابه المفاجئ، خصوصًا وإن الماتش مهم جدًا في مشوار الدوري.
ريال مدريد داخل اللقاء وهو في المركز التاني بـ72 نقطه، وورا برشلونة بـ4 نقط بس، والماتش على ملعب سانتياجو برنابيو، يعني كل حاجه كانت محطوطه عشان الفريق يلعب بكامل نجومه.
لكن بحسب شبكة “DAZN” الإسبانيه، تم استبعاد رودريجو بسبب إصابته بالأنفلونزا، وخافوا إنه ينقل العدوى لباقي اللاعيبه، خصوصًا مع ضغط المباريات الفتره الجايه.
وده غير غيابات تانيه كتير في الدفاع زي ميندي، روديجر، ميليتاو، وكامافينجا.
القائمة ضمت كورتوا، لونين، بيلينجهام، مودريتش، مبابي، فينيسيوس، وأسماء تانيه كتير، بس غياب رودريجو كان لافت للأنظار، خصوصًا إنه من العناصر المهمه اللي دايمًا بتصنع الفارق.
الجمهور منتظر يشوف هل الفريق هيقدر يتخطى الغيابات دي ولا لأ في مواجهه سيلتا الصعبه.
