مبابي يتفوق على ليفا وألفاريز وداخل سباق البيتشيتشي بقوة!
رغم إن بدايته مع ريال مدريد ماكانتشي مثالية، وناس كتير قالت إن مبابي مش هينجح في الليغا، لكن الراجل رد عليهم في الملعب، وبالأرقام كمان!
كيليان مبابي، المهاجم الفرنسي اللي كان عامل جدل كبير من أول يوم وصل فيه مدريد، رجع بقوة في 2025، وبيقدّم ريمونتادا تهديفية تحترم، وبيثبت يوم ورا التاني إنه مش جاي يتفرج، ده جاي يكسّر.
من أول يناير 2025، مبابي سجّل 12 جول في 13 ماتش في الليغا، وده رقم يخليه متصدر ترتيب هدافي الدوري لو حسبنا بس أهداف السنة الجديدة وده رغم إن الريال نفسه مر بفترات صعبة وانكسارات مش قليلة.
ولو بصينا على المنافسين، نلاقي إن مبابي متفوق على:
- خوليان ألفاريز (أتلتيكو مدريد): 10 أهداف من 15 ماتش.
- ليفاندوفسكي (برشلونة): 9 أهداف من 13 ماتش.
وده يخلينا نشوف قد إيه مبابي كان حاسم ومهم في 2025، خصوصًا لما الفريق كان محتاجه في اللحظات الصعبة.
ولما نحسب الترتيب الكلي للموسم، نلاقي إن مبابي في المركز التاني بـ22 جول، وفرق 3 أهداف بس عن ليفاندوفسكي المتصدر ولسه قدامهم 5 جولات يعني كل حاجة ممكنة، وسباق البيتشيتشي لسه مولّع!
مبابي فعلاً بيعيش أحسن فتراته، وبيبعت رسالة لكل جماهير الريال: “لسه ماتشفتوش كل حاجة مني!”
