أردا غولر ياخد فرصته أخيرًا ويتفوق على دياز في ريال مدريد
اللي كان لسه من كام شهر بيتقال عليه “مجرد متفرّج”، بقى دلوقتي اسم بيتحط أول واحد في تشكيلة ريال مدريد! أردا غولر، الولد التركي اللي استناه جمهور الملكي كتير، دخل خلاص في حسابات أنشيلوتي وبقى سابق إبراهيم دياز في المنافسة على المكان الأساسي.
صحيفة “آس” الإسبانية قالتها بصريح العبارة: مباراة سيلتا فيغو الجاية هتكون “غولر + عشرة”، يعني الولد خلاص بقى أساسي، ومكانه محفوظ في الهجوم.
من يوم 21 ديسمبر 2023، غولر مافيش مرة اتشال من قائمة الفريق، وده نفس اليوم اللي سجل فيه فاسكيز هدف ومن وقتها، عدى أكتر من 500 يوم وهو موجود في كل الماتشات، بس مشاركاته الفعلية كانت قليلة جدًا. لعب أساسي في 18 ماتش بس من أصل 88، يعني كان بيشم نفسه كل فين وفين.
بس اللي حصل في فبراير كان نقطة التحوّل أردا بدأ يظهر أكتر، شارك في 6 من آخر 13 مباراة، بنسبة مشاركة وصلت 46% من عدد مبارياته، وده في تلت الموسم بس! الصحف هناك سموها “الإنفجار المتأخر”، بس متأخر خير من عمره ما يحصل.
وفي أبريل؟ الأمور بقت نار شارك في 8 من آخر 10 مباريات، وسجّل هدف حاسم قدام خيتافي، وبعدها بصمته كانت واضحة في الكلاسيكو، لما مرّر لتشواميني هدف ولا أروع.
أنشيلوتي طلع يتكلم عنه وقال: “غولر مش بس جناح، ده لاعب وسط موهوب وعنده مهارة مش طبيعية مافيش زيه كتير، وهو هيكون مهم لينا جدًا في المستقبل”.
في نادي زي ريال مدريد، حتى فينيسيوس وفالفيردي بيقعدوا على الدكة، بس أردا استحمل وصبر، والنهارده وقت الحصاد فعلاً.
