بعد تحديد نهائي الكأس إلغاء معسكر الفراعنه فى أجندة يونيو رسميا
اتقرر بشكل نهائي إلغاء معسكر منتخب مصر اللى كان المفروض يتعمل فى الأجنده الدوليه لشهر يونيو الجاي بعد ما أعلن اتحاد الكوره عن موعد نهائي كأس مصر بين الزمالك وبيراميدز يوم 5 يونيو.
الاتحاد حدد الميعاد دا، وده خلى المعسكر يتلغي رسمي، خصوصًا وإن الموسم الكروي هيخلص بعد النهائي دا.
وكان فى خلاف حصل بين حسام حسن المدير الفني للفراعنه وبين اتحاد الكوره بسبب إن الأهلي هيسافر أمريكا يوم 2 يونيو عشان يحضر معسكر قبل كأس العالم للانديه واللى بيتضمن مباريات وديه وده معناه إن لعيبة الأهلي مش هينضمو للمعسكر.
حسام حسن مكانش راضي على كده خالص، لإنه شايف إن لعيبة الأهلي هما العمود الفقري للفريق ومعظمهم دوليين، وكان مخطط يلعب ماتشين وديين فى التوقف ده عشان نحسن ترتيبنا فى تصنيف الفيفا.
بس بعد تحديد ماتش الزمالك وبيراميدز واتحاد الكوره قرر يركز على الكاس فخلص الكلام، المعسكر اتلغى ومش هيبقى فيه مباريات ولا استعدادات فى التوقف ده.
وبكده، ملف معسكر يونيو اتقفل رسمي، وحسام حسن لازم يشوف حل بديل للفتره الجايه.
