مدرب ليفربول سلوت يشيد بصلاح وبيقول عقلية مشوفتهاش قبل كدا
آرني سلوت المدير الفني الجديد لفريق ليفربول اتكلم عن محمد صلاح بشكل إيجابي جدًا وقال إن عقليته مميزه من أول يوم وصل فيه لتدريب الفريق بداية الموسم.
سلوت اللى جه بدال يورجن كلوب قدر يحقق مع الريدز لقب الدوري الإنجليزي للمره العشرين فى تاريخهم وده كان إنجاز كبير ليه كبدايه.
فى حوار مع سكاي سبورتس سلوت قال صلاح كان أول واحد حضر لمعسكر بداية الموسم لإنه مكانش بيلعب مع منتخب بلده وقتها وده فرق معانا كتير
وأضاف المدرب الهولندي بصراحه انبهرت بيه من أول تمرين وهو جاهز بدنيًا وبيكسب فى كل سباقات الجري اللى كنا بنعملها
وكمل كلامه صلاح عقليته مميزه ومن أول لحظه حسيت إنه مختلف وكنت سعيد إن عندي لاعب بالتركيز ده وده اللى بيخليه دايمًا سابق باقي اللاعبين فى الجاهزيه ومستواه دايمًا ثابت
واضح إن سلوت معجب جدًا بصلاح وشايف إنه عنصر أساسي فى نجاح الفريق خصوصًا بعد ما ساعدهم فى تحقيق البطوله الغاليه.
