ريال مدريد بيكسب بصعوبه قدام سيلتا ولسه في سباق اللقب
ريال مدريد خطف فوز مهم وصعب من سيلتا، فوز خلى الأمل لسه موجود في سباق الدوري الإسباني، خصوصًا مع منافسه شرسه زي برشلونة والفريق عانى في الماتش بعد ما كان متقدّم 3-0، وسيلتا رجع في النتيجه، بس في الآخر الريال قدر يحسمها ويكمل فـ الطريق.
واضح إن الفريق داخل كل ماتش وعينه على اللقب، خصوصًا في المباريات الجايه ضد فرق زى إسبانيول وفياريال وأتلتيك بلباو، واللي لازم يكسبها عشان ميفرّتش نقطه واحده ووسط مشاكل برشلونة اللي خرج بدري من دوري الأبطال، الفرصه لسه موجوده والسباق مش محسوم.
أردا غولر، الولد التركي الموهوب، بقى بيقدّم أداء كبير في كل ماتش، سواء لعب في كوليسيوم، لا كارتوخا أو حتى في البرنابيو وبقى عنصر مهم، وبيتحرك بثقه وبيوزّع كرات لمبابي بطريقه عبقريه، وهدفه الأخير كان تحفه فنيه.
ومبابي؟ لسه مكمل في التألق، سجل هدفين في الماتش، واحد منهم كان بتسديده خرافية، والتاني بشماله قدام الحارس، ووصل لـ 24 هدف، يعني فاضلله هدف واحد ويلحق ليفاندوفسكي، وقريب كمان يعادل رقم صامورانو في أول موسم ليه مع الريال والكل منتظر الكلاسيكو قدام برشلونة، واللي ممكن يكون حاسم للقب.
ومن ناحيه تانيه، إياغو أسباس، الراجل اللي عنده 37 سنه، بيأكد إنه لسه عنده كتير، دخل آخر 20 دقيقه في الماتش وقلب اللعب، وخلّى ريال مدريد يعاني، وده بيثبت إن الموهبه مابتكبرش.
أما الحكم خيسوس جيل مانزانو، فمره تانيه بيثير الجدل. الراجل ماحسبش ضربتي جزاء واضحه للريال، وكمان ليه أخطاء قبل كده زي ما لغى هدف لبيلينغهام ضد فالنسيا، والناس خلاص فقدت فيه الثقه. جمهور الريال بقى بيشوفه خصم مش حكم.
بس مع كده، الريال بيقاوم، بيتعب، وبيكمل الفريق مش بيرضى يستسلم، ومع تألق غولر ومبابي، ومع عزيمه اللعيبه، مافيش حاجه مستحيله لسه في أمل، ولسه الدوري في الملعب.
