مندي يكتب التاريخ مع الأهلي أول أفريقي يتوّج بالأفضل في آسيا وأوروبا
إدوارد مندي، حارس مرمى الأهلي، كمل المشوار وتألق من جديد، ورفع الكاس الغالي مع فريقه بعد ما توّج بجايزة أفضل حارس في دوري أبطال آسيا للنخبة.
الجايزة دي مكانتش بس مجاملة، دي عن جدارة وإستحقاق بعد ما كان سد منيع قدام كاواساكي فرونتي الياباني في النهائي اللي إنتهى 2-0 لصالح الأهلي.
مندي، اللي عنده 33 سنة، مش جديد عالشهرة ولا الجوائز ده نفس الحارس اللي عمل ملحمة مع تشيلسي سنة 2021 وفاز بدوري أبطال أوروبا، وكان ليه دور كبير جدًا قدام مانشستر سيتي في النهائي وقتها خد لقب أفضل حارس في البطولة، ومن بعدها حصد جايزة “ذا بيست” من الفيفا متفوق عـ أسامي تقيله زي بوفون ونوير.
من يوم ما جه الأهلي في صيف 2023، ومندي بيقول لكل الناس إنه صفقة رابحة. لعب في البطولة الآسيوية 9 ماتشات، دخل في مرماه 8 أجوان بس، وطلع بـ3 كلين شيت في لحظات مصيرية.
والنهارده، مندي بيبقى أول حارس أفريقي يجمع بين جوائز الأفضل في أوروبا وآسيا، وده إنجاز تاريخي مش بسيط، بيأكد إن الحارس السنغالي ده واحد من أعظم الحراس في تاريخ الكورة.
مع الأهلي، لعب 70 ماتش، دخل فيه 68 جول، وطلع بـ30 ماتش كلين شيت وأرقام تحكي لوحدها عن صلابة الجدار السنغالي.
